Prosiect Paratoi: Cyngor Dinas Casnewydd
Cefnogir y Prosiect Paratoi, sef cydweithrediad rhwng Plant yng Nghymru a Voices from Care Cymru, gan gyllid o Gronfa Arloesi ar gyfer Darpariaeth a Chymorth Addas Llywodraeth Cymru.
Mewn partneriaeth â Chyngor Dinas Casnewydd, pobl ifanc sydd â phrofiad o ofal, gofalwyr maeth a gweithwyr proffesiynol lleol, rydym yn falch o lansio Padlet newydd sbon ar gyfer awdurdod lleol Casnewydd yn Saesneg ac yn Gymraeg. Mae'r adnodd hwn, a fydd yn lansio ar 19 Mehefin, wedi'i gyd-greu ochr yn ochr â'r union bobl ifanc y mae'n eu gwasanaethu ac mae wedi'i deilwra i gefnogi'r rhai sy'n paratoi ar gyfer byw'n annibynnol ledled Casnewydd a Chwmbrân.
Mae Padlet Casnewydd yn cynnig gwybodaeth gynhwysfawr, sy’n berthnasol yn lleol sy'n cwmpasu:
-
Cymorth byw'n annibynnol (e.e., awgrymiadau siopa bwyd)
-
Rheolaeth ariannol (e.e., cyllidebu, cyfrifon banc, cynilion)
-
Canllawiau cyflogaeth a gyrfaoedd (e.e., gwneud cais am swyddi)
-
Addysg a hyfforddiant (e.e., cefnogaeth bwrsariaethau)
-
Llesiant a chefnogaeth emosiynol (e.e., grwpiau lleol)
Bydd y pecyn cymorth amlbwrpas hwn yn cael ei gynnwys ar draws ein sianeli cyfryngau cymdeithasol i gyrraedd y gynulleidfa ehangaf bosibl, ac rydym yn croesawu ei gynnwys mewn e-friffiadau i hysbysu rhanddeiliaid ac ymarferwyr ledled Cymru.
Tystiolaeth gan ofalwr maeth yn awdurdod lleol Casnewydd:
“Mae’r Padlet hwn a’r Prosiect Paratoi wedi rhoi cymaint o wybodaeth ac atebion i ni yr ydym wedi bod yn chwilio amdanynt ers tro o ran hawliau addysg.”
Bydd y lansiad amserol hwn yn sicrhau bod gan bobl ifanc sydd â phrofiad o ofal, gofalwyr maeth a gweithwyr proffesiynol yng Nghasnewydd a Chwmbrân fynediad uniongyrchol at yr holl gyngor a chymorth allweddol sydd eu hangen arnynt mewn un platfform hawdd ei ddefnyddio.
