Grŵp Darparwyr Eiriolaeth Plant a Phobl Ifanc Cymru Gyfan: Ein hargymhellion ar gyfer Llywodraeth nesaf Cymru

Mae Grŵp Darparwyr Eiriolaeth Plant a Phobl Ifanc Cymru Gyfan wedi cyhoeddi ei flaenoriaethau ar gyfer Etholiad y Senedd 2026, gan alw ar Lywodraeth nesaf Cymru i gymryd camau i flaenoriaethu mynediad at gymorth eiriolaeth i fabanod, plant a phobl ifanc, ac i'r rhai sydd mewn sefyllfaoedd i eiriol drostynt.

Mae'r Grŵp, a reolir gan Plant yng Nghymru, wedi nodi'r blaenoriaethau y dylai Llywodraeth Cymru ymrwymo iddynt, sy'n cynnwys comisiynu adolygiad annibynnol o'r Dull Cenedlaethol ar gyfer Eiriolaeth Statudol; gwella'r trefniadau ar gyfer defnyddio'r Cynnig Gweithredol a'i adrodd; creu fframwaith comisiynu cenedlaethol ac adolygiad o'r fformiwla ariannu bresennol.

Mae'r adroddiad hefyd yn galw am ymestyn cefnogaeth eiriolaeth i bob plentyn mewn lleoliadau gofal preswyl; gwell darpariaeth eiriolaeth mewn lleoliadau iechyd, iechyd meddwl ac addysg, a chryfhau cefnogaeth Eiriolaeth Rhieni, darpariaeth gyffredinol a mynediad at Ymweliadau Annibynnol.

“Rhaid i leisiau plant a phobl ifanc fod wrth wraidd pob penderfyniad sy’n effeithio arnyn nhw. Wrth i ni agosáu at ddegawd ers cyflwyno'r Dull Cenedlaethol ar gyfer Eiriolaeth Statudol, a chyda'r Senedd yn dechrau pennod newydd ochr yn ochr ag ymrwymiad Llywodraeth Cymru i gael gwared ar elw o ofal, mae hwn yn foment hollbwysig i'n babanod, plant a phobl ifanc yng Nghymru, yn enwedig y rhai sydd fwyaf agored i niwed. Rydym yn annog pob plaid wleidyddol i gryfhau cefnogaeth eiriolaeth, gan sicrhau y gall pob plentyn a rhiant, yn enwedig y rhai sydd fwyaf mewn angen, gael mynediad at eiriolaeth annibynnol o ansawdd uchel. Rhaid i Lywodraeth nesaf Cymru roi babanod, plant, pobl ifanc a'u teuluoedd, a'r rhai sy'n hyrwyddo eu hawliau, wrth wraidd polisi ac ymarfer."
- Rhiannon Beaumont-Walker, Cadeirydd Grŵp Darparwyr Eiriolaeth Plant a Phobl Ifanc Cymru Gyfan a Phrif Weithredwr TGP Cymru