Prosiect Paratoi

Mae hwn yn brosiect newydd, cyffrous, sy’n cael ei gyflwyno gan Lleisiau o Ofal Cymru ar y cyd â Plant yng Nghymru, gyda chefnogaeth arian gan Lywodraeth Cymru o ‘Gronfa Arloesi Darpariaeth a Chefnogaeth Addas – Grant Atal Digartrefedd’ 2019-20.  Un o nodau’r gronfa hon yw cynyddu’r cymorth tai sydd ar gael i bobl ifanc agored i niwed sy’n pontio o ofal awdurdod lleol.

Nodau a Diben

Bydd y prosiect Paratoi yn cyd-fynd â chynllun cyfredol Llywodraeth Cymru, Pan fydda i’n Barod, gan ddarparu ymyriad dwysach sy’n ceisio adleisio’r gefnogaeth a’r arweiniad mae pobl ifanc nad ydynt yn derbyn gofal yn cael yng nghyd-destun y teulu. Bydd hyn yn ceisio mynd i’r afael â rhai o’r anghydraddoldebau mae’r boblogaeth sydd â phrofiad o ofal yn eu hwynebu wrth bontio o ofal.

Ein nodau cyffredinol yw:

• Darparu cefnogaeth i bobl ifanc bontio’n ddiogel o ofal (gan gynnwys ystyriaethau ynghylch gohirio gadael gofal a lleihau risg digartrefedd ac ansefydlogrwydd tai)
• Hwyluso cefnogaeth ddi-fwlch yn y gymuned, sy’n fwy cynaliadwy yn y tymor hir, heb ddibynnu ar gyllid yn y dyfodol i gyflawni canlyniadau cadarnhaol
• Grymuso pobl ifanc trwy wella’u gwybodaeth a’u dealltwriaeth o’u hawliau a’r pethau y dylen nhw eu cael wrth gynllunio i adael gofal
• Meithrin gallu pobl ifanc i eiriol o blaid newid
• Meithrin gwydnwch a mecanweithiau sy’n cadw pobl ifanc yn ddiogel rhag digartrefedd a risgiau cysylltiedig, gan wella’u llesiant cyffredinol
• Cyfrannu at nod y gronfa, sef atal digartrefedd a chyflawni sefydlogrwydd tai ymhlith ymadawyr gofal
• Cynnwys pobl ifanc wrth gynllunio, cyflwyno a gwerthuso’r prosiect

Diben y cyllid hwn yw cyflawni’r prosiect Paratoi mewn 3 ardal awdurdod lleol yng Nghymru – Ynys Môn, Sir Gaerfyrddin a RhCT, i bobl ifanc sy’n gadael gofal.

Bydd y prosiect yn darparu model tair haen o gefnogaeth ar gyfer y bobl ifanc hynny sy’n pontio o ofal; cefnogaeth unigol, cefnogaeth gan gyfoedion, cefnogaeth gan y gymuned. Bydd hyn yn cynnwys:

• Hwyluso cefnogaeth ddi-fwlch yn y gymuned
• Gwella gwybodaeth pobl ifanc am eu hawliau a’r pethau y dylen nhw eu cael wrth gynllunio i adael gofal, gan gynnwys gwella eu galluoedd ariannol
• Darparu cefnogaeth a hyfforddiant i’w galluogi i fyw’n annibynnol

Canfod beth yw eu hamgylchiadau o ran cyflogaeth ac addysg, a datblygu cynllun ar y cyd i sicrhau nad yw pontio o ofal yn amharu ar eu gwaith, eu hyfforddiant a/neu eu haddysg.

Os hoffech wybod mwy am y prosiect neu gyfranogi i’n gwaith cysylltwch ag Sean O’Neill (Cyfarwyddwr Polisi) am ragor o wybodaeth.